Рэальныя кейсы выкарыстання AI у бізнесе

Наталля Сцяпанцова, саўладальніца трох бізнесаў у Польшчы, на канферэнцыі Digital Forum K2 2026 расказала пра тое, якія нейрасеткі выкарыстоўвае ў сваіх бізнесах.

Публікуем канспект выступлення Наталлі з рэкамендацыямі і лайфхакамі для бізнесу.

Транскрыбацыя і дыктоўка

— Рычард Брэнсан раіў заўсёды насіць з сабой блакнот і запісваць ідэі. Але паколькі мы жывём у эру AI, блакнот вам больш не патрэбны. Вы можаце выкарыстоўваць транскрыбатар. Я карыстаюся транскрыбатарам SpeakUp, які эканоміць мне прыкладна 4-5 гадзін на тыдзень.

Зараз у мяне транскрыбуюцца абсалютна ўсе нарады. Пасля кожнай размовы з супрацоўнікам або партнёрам я магу зрабіць рэзюмэ, у якім будуць распісаны ўсе задачы, дэдлайны і нашы дамоўленасці. Гэтым лёгка падзяліцца, не трэба займацца руцінай уручную.

Яшчэ адзін суперлайфхак, які я выкарыстоўваю, — гэта дыктоўкі. Я карыстаюся Wispr Flow, і ён працуе з усімі праграмамі на маім камп’ютары. Я магу дыктаваць email’ы, паведамленні ў WhatsApp, Telegram, магу надыктоўваць дакументы — усё што заўгодна. Я не паленавалася і загугліла статыстыку: хуткасць друку сярэдняга чалавека складае 35–50 слоў за хвіліну, а хуткасць нашага маўлення — 130–150 слоў за хвіліну. То бок вы паскараецеся ў 3 разы!

Акрамя таго, не ведаю, ці падзяляеце вы маё меркаванне, але я цярпець не магу друкаваць па-польску: гэтыя літаркі, для ўводу якіх трэба заціскаць камбінацыі з дзвюх клавіш, заўсёды прымушаюць мяне вяртацца і ўсё пераправяраць.

ШІ, які працуе толькі на вашых дадзеных

Чым добры NotebookLM? Па-першае, гэта закрытая база даных. Вы самі выбіраеце, з якімі файламі, спасылкамі і крыніцамі будзе працаваць штучны інтэлект. Такім чынам вы пазбягаеце «галюцынацый» і смеццевай інфармацыі. Вы цалкам упэўнены, што ШІ выкарыстоўвае толькі тое, што вы адабралі.

Па-другое, гэта разнастайныя фарматы выдачы. Вы можаце зрабіць прэзентацыю, інтэлектуальную карту, карткі для вывучэння працэсу ці нават згенераваць падкаст, дзе два ШІ-дыктара будуць абмяркоўваць загружаную вамі тэму.

Вось як я выкарыстоўваю NotebookLM у сваім бізнесе:

• Анбордынг навічкоў. У NotebookLM загружана база даных, працэдуры, рэгламенты і дакументы нашай кампаніі. Новы супрацоўнік можа пачытаць дакументы, паслухаць ШІ-падкаст па іх або паглядзець прэзентацыю — выбраць той фармат, які дапаможа яму хутчэй навучыцца.
• FAQ для кліентаў. NotebookLM зручны тым, што вы можаце даць доступ да базы любому чалавеку. Ён не зможа змяняць вашыя файлы, але зможа задаваць пытанні сістэме і імгненна атрымліваць правільныя адказы на аснове вашых рэгламентаў.
• Стварэнне офераў. Вы можаце загрузіць усю інфармацыю пра кампанію, каб генераваць разнастайныя прэзентацыі і камерцыйныя прапановы.
• Параўнанне прапаноў. Напрыклад, вы выбіраеце, які станок купіць. У вас шмат параметраў, цэн, прапаноў. Вы загружаеце ўсё гэта ў NotebookLM, і ён робіць для вас зводную аналітыку з аргументаваным адказам, які станок больш выгадны і чаму.
• «Разведка». Калі вы рыхтуецеся да важнай сустрэчы або тэндару, вы загружаеце інфармацыю пра партнёра (дакументы або надзейныя спасылкі з Google) і просіце ШІ зрабіць summary: якія ў партнёра болі (праблемы) і як лепш скласці для яго прапанову.

Gemini і яго агенты

Што такое Gemini Gems? Гэта даволі простыя ШІ-агенты, якія настройваюцца пад паўтаральныя задачы.

Самы просты прыклад — выстаўленне новых картак тавараў на маркетплэйсе. Мы выкарыстоўваем асобнага агента, якога я назвала Allegro Guru. Ён выстаўляе карткі на маркетплэйс згодна з тэхнічным заданнем. Мы адзін раз задалі яму параметры: правілы SEO для Allegro, абмежаванне назвы ў 75 знакаў, якія ключавыя словы выкарыстоўваць, колькі ў нас раздзелаў, як часта ставіць эмодзі і гэтак далей. Цяпер, калі прыходзяць новыя тавары, мне не трэба нічога тлумачыць. Я проста высылаю яму фотаздымак прадукту або фота каробкі з інструкцыяй і пішу: «Выстаў картку». Ён робіць усё сам.

Іншыя спосабы выкарыстання Gems:

• Карпаратыўныя памочнікі. Усе вашыя менеджары па продажах могуць выкарыстоўваць аднаго і таго ж наладжанага агента, што дазваляе ім рабіць складаную працу ў адзін клік.
• Персанальныя ментары. Я спампавала відэа з YouTube-канала вядомага эксперта па продажах, загрузіла файлы ў NotebookLM, падключыла да агента і назвала яго Sales Guru. Цяпер у гэтага ШІ логіка і алгарытмы блогера, і я магу раіцца з ім наконт стратэгіі продажаў.
• Фітнес-трэнер. Вы можаце загрузіць у Gemini Gems свае медыцынскія даныя, смакавыя перавагі, жаданую вагу, і ён складзе вам падрабязны план харчавання і трэніровак.

І не забывайце выкарыстоўваць файлы фармату .md (Markdown): у іх зручна прапісваць агульныя сістэмныя інструкцыі для Gemini (які стыль маўлення выкарыстоўваць, прафесійны тон, ролі і г.д.).

Аўтаномны агент

Агент Claude Cowork выйшаў нядаўна, але я ўжо ў абсалютным захапленні ад яго магчымасцей. У адрозненне ад простых чат-ботаў, гэта агент, які вырашае шматузроўневыя, паўтаральныя і запланаваныя задачы.

Як ён працуе ў мяне ў бізнесе:

• Штотыднёвае даследаванне. Кожны тыдзень па раскладзе ён сам адкрывае браўзер Chrome, шукае актуальную інфармацыю па FMCG-рынку і збірае для мяне навінавы дайджэст. Мне наогул нічога не трэба рабіць — я адзін раз наладзіла задачу «ў аўторак а 10-й».
• Аналітыка прапаноў. Раз на тыдзень ён аўтаматычна збірае ўсе ўваходныя камерцыйныя прапановы ад пастаўшчыкоў, супастаўляе іх з нашай базай (у нас 12 000 SKU) і за 3 хвіліны выдае справаздачу: «Па гэтых 117 прадуктах зараз найлепшая цана, а вось 300 новых тавараў». Я проста аддаю гэтую справаздачу менеджарам.
• Навядзенне парадку ў файлах. Claude Cowork мае доступ да файлавай сістэмы вашага камп’ютара (да тых папак, якія вы яму дазволіце). Я даю яму доступ да папкі «Спампоўкі», дзе ў мяне ляжаць тысячы файлаў. За 3 хвіліны ён бездакорна наводзіць там парадак: раскладвае дакументы па адных папках, фота — па іншых, выдаляе дублікаты.
• Бізнес-аналітыка. Я магу зкарміць яму вялізныя выгрузкі па продажах з Allegro, і ён не проста іх звядзе, але і дасць парады па паляпшэнні паказчыкаў.
• Зверка дакументаў. Калі скласці ў адну папку інвойсы ад пастаўшчыкоў, а ў іншую — банкаўскія выпіскі, ён за 5–10 хвілін зробіць Excel-справаздачу пра тое, якія фактуры аплачаны, а якія — яшчэ не.

Ці трэба баяцца AI?

Узгадваецца гісторыя пра лудзітаў у Англіі, якія па начах урываліся на фабрыкі і разбівалі станкі, бо баяліся, што тыя забяруць у іх працу. З ШІ зараз адбываецца нешта падобнае.

Але я не бачу, каб нейрасеткі забралі працу ў маіх супрацоўнікаў. Наадварот, ШІ дае малому бізнесу тыя ж суперсілы, якія раней былі толькі ў вялізных карпарацый. У мяне ў офісе кожны супрацоўнік — «чалавек-аркестр». Я не баюся, што мне давядзецца кагосьці звальняць. Я баюся, што нам не хопіць грошай на закуп тавараў, бо з дапамогай ШІ мы пачнём расці занадта хутка.