Дзяніс 25 гадоў працаваў у Беларусі ў сферы аўтазапчастак, а калі пераехаў у Польшчу ў 2017 годзе, то змяніў шмат прафесій: вадзіў фуры і аўтобусы, будаваў варшаўскае метро. А потым заснаваў Denis Drive — сетку аўташкол, якая сёння працуе ў Варшаве, Уроцлаве, Гдыні і Беластоку. Гісторыю поспеху расказвае MOST.
Ідэя бізнесу нарадзілася з падказкі знаёмага: калі ёсць усе вадзіцельскія катэгорыі, то чаму б не пайсці працаваць інструктарам? Дзяніс адвучыўся, папрацаваў па найме, а потым паспрабаваў адкрыць аўташколу. Першы вопыт з бізнес-партнёрам быў няўдалым, але ў 2022 годзе Дзяніс запусціў ужо цалкам уласную аўташколу. На старце ў кампаніі было ўсяго два чалавекі: жонка працавала менеджарам, а Дзяніс — інструктарам.
«Спачатку даводзілася працаваць па 14–16 гадзін на суткі. Пастаянна ездзіў, катаўся — без прыпынку. Попытам я карыстаўся, вядома, вельмі вялікім: рускамоўных інструктараў тады было, можа, адзін-два на ўсю Польшчу», — успамінае Дзяніс.
Паступова каманда аўташколы расла, і філіялы Denis Drive з’явіліся ва Уроцлаве, у Гдыні, а зусім нядаўна — у Беластоку.
Сёння асноўны паток кліентаў школы — гэта ўкраінцы, беларусы, а таксама ўзбекі, таджыкі і малдаване.
Дзяніс падкрэслівае, што яго праект — гэта ў першую чаргу адукацыйная ўстанова, якая трымаецца не на машынах і партах, а на людзях. Каманда інструктараў і офісных менеджараў стала абсалютна інтэрнацыянальнай.
«У нас працуюць інструктары розных нацыянальнасцей: палякі, беларусы і ўкраінцы. Многія могуць выкладаць на англійскай мове. Таму ў офісе часам можна пачуць адразу некалькі моў: украінскую, беларускую, рускую, англійскую і польскую».
Сам заснавальнік з працэсу не выйшаў: ён ездзіць па філіялах і чытае курсантам лекцыі па Правілах дарожнага руху.