У 2019 годзе юрыстка Гродзенскага аблвыканкама Алена Пракаповіч зразумела, што выгарэла на працы. І звольнілася, каб прысвяціць сябе дому і траім дзецям. Але замест спакойнага жыцця хатняй гаспадыні Алена знайшла сябе ў цалкам новай сферы — сёння яна валодае адзіным у Гродне апарт-гатэлем «У Грушы» з прыстаўкай «арт», а таксама невялікім кафэ. Гісторыю яе бізнесу расказвае Office Life.
Усе карціны ў нумарах можна купіць
Ідэя бізнесу нарадзілася выпадкова: брат Алены шукаў памяшканне пад кафэ і паказаў ёй цікавы будынак з 1883 года. У розныя часы тут размяшчаліся даходны дом, шпіталь і камунальныя кватэры. Алена ўспомніла сваё вясельнае падарожжа ў Санкт-Пецярбург і атмасферную кватэру, пераробленую са старой камуналкі. І вырашыла паўтарыць гэта ў Гродне.
Так у 37 гадоў былая юрыстка стала кіраваць памяшканнямі з багатай гісторыяй. Назву «У Грушы» ўзялі ад карчмы, якая калісьці знаходзілася на гэтым месцы.
Канцэпцыя гатэля пабудавана на беражлівым стаўленні да гісторыі, бо падчас рэканструкцыі памяшканняў былі захаваны старыя драўляныя падлогі і цагляныя сцены, а таксама на мастацтве — нумары ўпрыгожваюць рэпрадукцыі вядомых гродзенскіх мастакоў. Дарэчы, пастаяльцы могуць выкупіць арыгіналы карцін, калі яны ім вельмі спадабаюцца.
Ці можна на гатэлі зарабіць «залатыя горы»?
Арэнда гістарычнага будынка — даволі смелая задума, бо існуе мноства абмежаванняў. Але Алене арыентавацца ў паперах дапамагае яе шматгадовы досвед працы юрысткай.
Гатэль развіваецца паступова. Спачатку сродкаў хапіла толькі на запуск першага, самага маленькага нумара. Грошы ад яго здачы адразу пайшлі на рамонт наступнага. Цяпер арт-гатэль «У Грушы» складаецца з шасці нумароў у розных будынках у крокавай даступнасці адзін ад аднаго. Таксама Алена адкрыла пры гатэлі сваё кафэ.
Магчымасць выкупу памяшканняў арт-гатэля Алена разглядала, але горад пакуль не дае на гэта дазволу.
— Даход ад гатэля — гэта не нейкія «залатыя горы». Для мяне гэта свайго роду нятаннае хобі. У нас апартаменты знаходзяцца ў розных будынках, што заўсёды звязана з нейкімі дадатковымі выдаткамі. Дапусцім, у сёмы нумар, які вось-вось адкрыецца, патрэбныя вулічныя дзверы з добрай гука- і цеплаізаляцыяй, — расказвае Алена.
Цяпер у штаце гатэля і кафэ ўжо працуюць надзейныя людзі, але бываюць дні, калі гаспадыні даводзіцца самой засяляць гасцей, вырашаць бытавыя праблемы і нават працаваць садоўнікам. Вяртацца ў офіс яна пры гэтым не плануе.
— Надзвычай рэдка я магу пасумаваць: вось закрыла б кабінет а пятай гадзіне і пайшла на выхадныя або ў адпачынак спакойна на 30 дзён, а не так, што ў суботу трэба да сямі гадзін пад’ехаць на працу. А потым разумееш, што гэта ж так класна! — прызнаецца Алена.