Ва ўладальнікаў «Манчэстэр Юнайтэд» знайшліся беларускія карані

Больш за дваццаць гадоў таму амерыканскі бізнесмен Малкальм Глэйзер стаў уладальнікам аднаго з самых папулярных футбольных клубаў свету — «Манчэстэр Юнайтэд». Беларускія архівісты з аб’яднання «Скарб» знайшлі дакументы, якія пацвярджаюць беларускі след у сямейных каранях бізнесмена — яго бацька пераехаў у ЗША з Паставаў.

Крама дробязяў у Паставах

Гісторыя дынастыі пачалася ў канцы XIX стагоддзя ў Паставах. Бабуля будучага мільярдэра, Бейля Абрамаўна Свірская, нарадзілася ў сям’і мясцовага мешчаніна, які валодаў уласным домам. У канцы 1880-х гадоў яна выйшла замуж за Моўшу-Іцэка Глезера.

Каля трыццаці гадоў сям’я Глэйзераў жыла ў Паставах. Бейля вяла там прадпрымальніцкую дзейнасць — валодала невялікай крамай дробязяў на вуліцы Віленскай (цяпер Савецкая), якая размяшчалася ў іх уласным доме. У сужэнцаў нарадзілася каля дзесяці дзяцей, з якіх выжылі шасцёра.

Эміграцыя ў ЗША

Перад Першай сусветнай вайной адзіны сын Глэйзераў, Абрам, эміграваў у ЗША. Архівісты мяркуюць, што юнак з’ехаў, каб пазбегнуць прызыву ў армію ў 1912 годзе. Такія ўцёкі ад службы пагражалі яго сям’і буйным на той час штрафам у 300 рублёў, аднак менавіта гэтае рашэнне змяніла лёс дынастыі.

У ЗША Абрам Глэйзер паспяхова ўладкаваўся, ажаніўся з дзяўчынай Ханнай з сям’і Гэніс, і ў амерыканскім перапісе насельніцтва за 1930 год ужо згадваецца маленькі хлопчык Малкальм.

Пабудова бізнес-імперыі і набыццё легендарнага клубу

Малкальм Глэйзер пачаў свой шлях у бізнесе з атрыманай у спадчыну ад бацькі аптовай ювелірнай крамы, маючы на руках усяго 300 долараў. Пазней ён пераключыўся на нерухомасць і заснаваў холдынгавую кампанію First Allied Corporation. У 1995 годзе Малкальм Глэйзер увайшоў у спартыўны бізнес, купіўшы каманду па амерыканскім футболе «Тампа-Бэй Бакканірс» за 192 мільёны долараў.

У 2003 годзе прадпрымальнік пачаў скупляць акцыі англійскага футбольнага клуба «Манчэстэр Юнайтэд» і да 2005 года атрымаў над ім поўны кантроль. Сума ўгоды склала каля 800 мільёнаў фунтаў стэрлінгаў (каля 1,4 мільярда долараў). Купля выклікала масавые пратэсты заўзятараў — тысячы фанатаў адмаўляліся абнаўляць свае сезонныя абанементы. Але тым не менш клуб застаўся пад кіраваннем сям’і Глэйзераў.

Малкальм Глэйзер памёр 28 мая 2014 года ў Рочэстэры, а долі ў футбольным клубе дасталіся яго дзецям.

«Манчэстэр Юнайтэд», заснаваны ў 1878 годзе як «Ньютан Хіт» і перайменаваны ў 1902 годзе, з’яўляецца адным з самых тытулаваных клубаў у гісторыі англійскага футбола.

Каманда, якая выступае на легендарным стадыёне «Олд Трафард» з 1910 года, за сваю гісторыю заваявала 20 тытулаў чэмпіёна Англіі, 13 Кубкаў Англіі, а таксама тройчы выйгравала Лігу чэмпіёнаў УЕФА (Кубак еўрапейскіх чэмпіёнаў).

Лёс сваякоў, якія засталіся ў Беларусі

У той час як амерыканская галіна сям’і развівала буйны бізнес, сваякі, якія засталіся ў Беларусі, працягвалі займацца сціплым гандлем. Пасля Першай сусветнай вайны Бейля Глезер з дочкамі пераехала ў Глыбокае. Архіўныя дакументы за 1938 год згадваюць Бейлю як уладальніцу дома на вуліцы Замкавай, дзе Бейля Абрамаўна разам з дачкой Маняй займалася гандлем.

Іх лёс склаўся трагічна: у 1941–1943 гадах падчас знішчэння Глыбоцкага гета амаль усе сваякі Глэйзераў, якія засталіся на радзіме, загінулі.

Выжыць удалося толькі ўнучцы Бейлі — Розе Хейфец, якая служыла медсястрой у партызанскім атрадзе.