10 беларусак выступяць на TEDxUlicaMińskaWomen 7 лістапада ў Варшаве
Другая канферэнцыя праекта TEDxUlicaMińska адбудзецца 7 лістапада ў Варшаве на пляцоўцы Teatr WAM. Мерапрыемства пройдзе ў фармаце TEDxWomen, а заяўленую тэму «Anything You Can Do» («Усё, што ты можаш зрабіць») раскрыюць 10 спікерак-беларусак.
Вось як тлумачаць арганізатары выбраны фармат:
«Women — гэта фармат TEDx, які ставіць у цэнтр чырвонага кола ідэі жанчын і тэмы, звязаныя з жаночым досведам. Гэта не азначае, што падзея „толькі для жанчын”. TED наўпрост вызначае TEDxWomen як адкрыты фармат: прыйсці могуць людзі любога гендэра. Women падкрэслівае толькі фокус размовы, а не тое, хто запрошаны ў залу».
Канферэнцыя разлічана на прадпрымальнікаў, кіраўнікоў, спецыялістаў тэхналагічных кампаній, выкладчыкаў, дзеячаў мастацтва і ўсіх, каму цікавы інтэлектуальны дыялог.
7 лістапада на сцэну TEDxUlicaMińskaWomen выйдуць 10 прадстаўніц бізнесу, тэхналогій, навукі і культуры.
Аляксандра Сцельмашонак
Мастачка, дызайнерка, выкладчыца і чалавек, які ўжо больш за 15 гадоў прымушае рукапісныя сімвалы гаварыць.
Яна выстаўляе свае працы ад Варшавы да Уругвая, напісала тры падручнікі па каліграфіі, стварыла чатыры паўгадовыя ментарскія праграмы і ўжо выходзіла на сцэну TEDx у 2019 годзе.
«Для Аляксандры каліграфія — гэта спосаб знайсці ўласны голас. Літары ў яе руках становяцца не атрамантам на паперы, а жывой мовай любові. А яе творчы шлях выглядае як сапраўдная мультыдысцыплінарная прыгода: ад графічнага і кніжнага дызайну да летэрынгу, каліграфіі і кніг мастака. І яшчэ адзін факт, які шмат што тлумачыць: Аляксандра называе сваёй галоўнай суперсілай не прафесійныя навыкі, а любоў, якую ўкладвае ў свае працы і вучняў».
Тры словы пра Аляксандру: Sweet. Loving. Rebel.
Тры тэмы, на якія з ёй можна пагаварыць: графічны дызайн і ілюстрацыя, дзе вы слухаеце цішыню, каліграфія як здабыццё голасу.
Марыя Лойка
Чалавек, для якога «занадта шмат» — гэта не праблема, а стыль жыцця.
Магістр хіміі, былая кіраўніца R&D-лабараторыі лакафарбавых матэрыялаў, а цяпер даследчыца Польскай акадэміі навук. Працавала і ў беларускай навуцы, і ў хімічнай прамысловасці, займалася ўсім — ад сінтэзу вадкіх крышталяў і фармацэўтычных субстанцый да ферментных прэпаратаў і будаўнічых матэрыялаў. Цяпер даследуе цэменты, бетон і тое, як яны паводзяць сябе пад уздзеяннем напружання і разбурэння.
Марыя яшчэ і папулярызатарка навукі, стварае праект «Біямалекула», піша артыкулы і рэцэнзіі на кнігі і адкрыта змагаецца з думкай, што навука — гэта сумна.
Тры словы пра Марыю: бывае занадта шмат.
Тры тэмы для размовы: прыродазнаўчыя навукі, інжынерыя, гісторыя.
Вераніка Здановіч
C-level менеджарка ў health-tech, працуе на стыку тэхналогій, здароўя і эмпатыі.
«Развівае прадукт, які дапамагае зніжаць стрэс, прадухіляць выгаранне і мець больш добрых дзён. А дома ў яе — яшчэ адзін праект са штодзённымі дзедлайнамі: дзве дачкі. Таму баланс для Веранікі — не прыгожае слова з прэзентацыі, а нешта, што даводзіцца правяраць на практыцы кожны дзень.
Яна працуе там, дзе тэхналогіі сустракаюцца з чалавечнасцю. І гэтае спалучэнне ўжо само па сабе цікавае».
Тры словы пра Вераніку: Энергія. Візіянерства. Эмпатыя.
Тры тэмы, на якія з ёй можна пагаварыць: рост бізнесу, Health Tech, эмпатычнае лідарства
Марыя Лемяза
Дапамагае бізнесам расці, выходзіць на міжнародныя рынкі і прымаць стратэгічныя рашэнні.
Прадпрымальніца, міжнародная фінансавая кансультантка, CEO і заснавальніца міжнароднай групы кампаній SMAR GLOBAL, сяброўка ACCA (Association of Chartered Certified Accountants), спікерка міжнародных канферэнцый і аўтарка адукацыйнага праекта MayTry, які атрымаў узнагароду Forbes.
«А цяпер дадайце сюды яшчэ адну пасаду, якую немагчыма вынесці ў подпіс пад email: мама дзвюх дачок. Для Марыі лідарства — гэта не толькі пра амбіцыі і вынікі. Яна разважае пра тое, як адначасова захоўваць баланс паміж адказнасцю, мэтамі і самім жыццём».
Тры словы пра Марыю: Сістэмнасць. Смеласць. Упартасць.
Тры тэмы, на якія з ёй можна пагаварыць: бізнес, мацярынства, інвестыцыі
Мая Церакулава
Лекарка, магістр грамадскага здароўя і медыцынская блогерка з 12-гадовым клінічным досведам.
«Працавала ў педыятрыі і добра ведае, як выглядае сустрэча чалавека з медыцынай па-за падручнікам: трывога, пытанні, міфы і вялікае жаданне нарэшце зразумець, што з табой адбываецца. Менавіта таму Мая зрабіла веды сваім інструментам барацьбы з медыцынскай дэзінфармацыяй. Яна тлумачыць, як працуе цела і што стаіць за ЗОЖ — без магіі, без страшылак і без «мне бабуля казала». А яшчэ ў яе ёсць хобі, якое гучыць як назва выдатнага серыяла: «даведнік лекара ў постапакаліпсісе». Запісы пра тое, што рабіць з сучаснымі медыцынскімі ведамі ў свеце без сучаснай тэхнікі і фармакалогіі».
Тры словы пра Маю: Энергічная. Свабодная. Скептычная.
Тры тэмы для размовы: музыка — пра тое, як адхіленне ад нормы становіцца часткай твора; літаратура — пра кагнітыўную эмпатыю і іншыя спосабы думаць і жыць; медыцына — пра клінічныя выпадкі, парадоксы і нечаканыя эфекты.
Алёна Смаляк
Заснавальніца і CEO моўнай школы Polish for Belarus, якую стварыла з нуля, без інвестыцый і партнёраў.
«За дзесяць гадоў школа вырасла ў адзін з найбуйнейшых адукацыйных праектаў для рускамоўных імігрантаў у Польшчы і дапамагла тысячам людзей вывучыць польскую і пачаць новае жыццё. Але цікавы не толькі вынік. Алёна адначасова прадпрымальніца, кіраўніца і выкладчыца — чалавек, які сам будаваў каманды, прадукты і сістэму, а цяпер праз гэты досвед разважае пра развіццё, лідарства і чалавечыя змены. А яшчэ яна піша музыку, дыджэіць, займаецца спортам і любіць сучаснае мастацтва».
Тры словы пра Алёну: Дысцыпліна. Адказнасць. Рэфлексія.
Тры тэмы, на якія з ёй можна паразмаўляць: бізнес і кіраванне, падарожжы, электронная музыка.
Святлана Талатай
Піяністка, музычная асветніца і даследчыца гуку, развівае сваю фартэпіянную студыю
Стварыла праект «Нясумныя лекцыі» і аўтарскі падкаст Parasons, мае акадэмічную музычную адукацыю, вучылася культурнаму менеджменту, а яшчэ атрымала адукацыю ў кіна- і тэлевытворчасці ў Варшаве.
«Святлана даследуе гук, ідэнтычнасць і эміграцыю, выступала на міжнароднай канферэнцыі па гукавым мастацтве ў Партугаліі і супрацоўнічала з фондам Элтана Джона. Вельмі цікавы набор жыццёвых сюжэтаў».
Тры словы пра Святлану: Музыка. Эміграцыя. Голас.
Тры тэмы, на якія з ёй можна пагаварыць: эміграцыя і інтэграцыя без страты сябе, замежныя мовы і іх уплыў на наша мысленне, культурныя і даследчыя праекты.
Наталля Зубрыцкая
Жыве ў Іспаніі і працуе з партнёрамі з больш чым 30 краін свету.
«Наталля сябруе і працуе з людзьмі розных культур, а дзякуючы жыццю за мяжой і працоўным паездкам з гонарам нясе сцяг неафіцыйнай амбасадаркі Беларусі і Гішпаніі. Асабліва яе цікавіць, як эміграцыя змяняе жанчын і іх жыццё. Наталля пастаянна сустракае жанчын, чые гісторыі натхняюць развівацца, адкрываць новае і быць карыснай для іншых».
Тры словы пра Наталлю: Актыўная. Смелая. Міралюбівая.
Тры тэмы, на якія з ёй можна пагаварыць: дызайн працоўных прастор, усё пра Гішпанію, лінгвістыка.
Анна Ляўковіч
Доктарка па адукацыі. Прадпрымальніца па жыцці. Экспертка па віне — з дыпломам WSET і тытулом Champagne Master.
Больш за дзесяць гадоў займаецца прадпрымальніцтвам, стратэгіяй брэндаў і адукацыяй. Яна заснавальніца і CEO Oecumene Champagne & Wine Bar у Вільні, а яшчэ чалавек, які ўмее злучаць навуковае мысленне, бізнес і культуру ў адзін захапляльны погляд на свет.
«Анну цікавіць, як наш досвед, культура і ўласныя ўяўленні ўплываюць на тое, як мы ўспрымаем звыклыя рэчы. Часам дастаткова паглядзець на нешта пад іншым вуглом — і звыклае раптам адкрываецца зусім па-новаму. Яна натхняецца падарожжамі, кнігамі, мастацтвам, гастраноміяй, гісторыяй і людзьмі, якія не баяцца задаваць пытанні і пераасэнсоўваць звыклыя ўяўленні».
Тры словы пра Анну: Цікаўная. Сістэмная. Смелая.
Тры тэмы, на якія з ёй можна пагаварыць: культура віна, прадпрымальніцтва, як выжываць сярод ідыётаў.
Дар’я Данілава
Серыйная стартаперка і заснавальніца некалькіх кампаній.
Ведае, што такое будаваць B2B SaaS-бізнес, прыцягваць інвестыцыі, праходзіць праз крызісы і прымаць складаныя стратэгічныя рашэнні.
«Але за задачамі бізнесу ў яе гісторыі ёсць яшчэ адна важная тэма — каштоўнасці. Дар’я гаворыць пра тое, як выбудоўваць жыццё і бізнес вакол таго, што для цябе сапраўды важна, як захоўваць чалавечнасць у вялікіх амбіцыях і як спалучаць прадпрымальніцтва з усвядомленым мацярынствам.
Яе асабістая тройка — свабода выбару, адказнасць і чалавечнасць. І, здаецца, гэта добра тлумачыць, чаму ў яе гісторыі бізнес ніколі не існуе сам па сабе».
Тры словы пра Дар’ю: Смеласць. Сумленнасць. Любоў.
Тры тэмы для размовы: стартапы, рост у крызісных сітуацыях і M&A; жыццё і бізнес, арыентаваныя на каштоўнасці; усвядомленае мацярынства.
Арганізатары раяць не ісці на падзею «дзеля адной спікеркі»: на TEDx побач аказваюцца розныя сферы, і галоўны інсайт вечара часта прыходзіць з самай нечаканай тэмы.
«На добрай прафесійнай канферэнцыі вы прыкладна ведаеце, па што ідзяце ці дзеля каго. На TEDx усё наадварот: побач апынаюцца медыцына, бізнес, мастацтва, навука, гісторыя, асабісты досвед — рэчы, якія вы самі ніколі не сталі б шукаць у адным месцы.
І практыка паказвае, што галоўны інсайт вечара вельмі часта прыходзіць не з таго выступлення, дзеля якога вы прыйшлі. У гэтым і ёсць задавальненне ад TEDx: на некалькі гадзін дазволіць сабе быць чалавекам, якому цікава значна больш, чым яго прафесія, звыклае кола і стужка сацсетак».
Таксама каманда TEDxUlicaMińska звяртае ўвагу, што ёсць яшчэ адзін важны пласт — гэта глабальны фармат, які робяць беларусы ў эміграцыі:
«Такая цалкам сапраўдная беларуская soft power — ідэі, важныя нам і зразумелыя свету».
Канферэнцыя адбудзецца ў суботу, 7 лістапада 2026 года, у варшаўскім Teatr WAM. Пляцоўка адчыніць дзверы для гасцей а 12:00, а самі выступы распачнуцца а 13:00.
Праграма складаецца з серыі прамоў працягласцю да 10 хвілін, якія могуць гучаць на беларускай, рускай, польскай або англійскай мовах. Акрамя дакладаў, у раскладзе запланаваны абедзенны перапынак, разлічаны на нетворкінг, дыскусіі і асабістыя знаёмствы са спікеркамі і іншымі гасцямі.
Асобны акцэнт арганізатары робяць на атмасферы і вызначылі дрэс-код мерапрыемства як «Усё найлепшае адразу». Гэта не патрабуе абавязковых строгіх смокінгаў ці класічных вечаровых сукенак: каманда, наадварот, заклікае надзець любімыя, смелыя ці нават эксцэнтрычныя рэчы, для якіх звычайна бракуе нагоды — пінжак з паеткамі, чырвоныя туфлі ці незвычайныя ўпрыгажэнні. Каманда і валанцёры канферэнцыі плануюць падтрымаць гасцей у іх выбары, а галоўнае правіла падзеі гучыць проста: «каб вам было добра».
Квіткі на TEDxUlicaMińskaWomen даступныя на сэрвісе Fienta: стандартны ўваходны квіток каштуе 250 злотых, а падтрымаць далейшае развіццё праекта і падрыхтоўку кантэнту можна праз набыццё квітка TEDx Friend за 500 злотых.